الاماكن

كتير كنت بفكر اني ارجع اكتب تاني بس مكنتش بقدر اكمل صراحه كنت عايز اكتب مواضيع والناس متعرفش انا مين

وفكرت افتح مدونه تانيه

طب فيها ايه ما تكتب اللي انت عايزه؟

برضه مقدرش اكتب حجات بتالمني وبتفرحني ويكون في ناس عارفني لازم شويه خصوصيه برده

ايه الجبن ده؟
اه جبن وانت مالك صحيح

طب ما تبطل رغي شويه وادخل في الموضوع؟
طيب ياعم براحه شويه

طبعا انا مش قصدي اغنيه الاماكن بتاعه محمد عبده

الاماكن بالنسبه ليا عمري ما شفتها زي ربنا ما خلقها كده .....فعلا صحيح...... دايما بشوف المكان علي انه شخص

بمعني اصح روح وممكن نقول ان كل روح من الاربعه هي محافظه معينه
يعني كلامي هيكون علي امكان مش اشخاص

البحيره
الروح الاولي دي بشوفها كانها امي وده المكان اللي اتولدت فيه عشان كده احساسي بالحنين وانا مسافر مش لاهلي بس ده

كمان حنين للمكان لما بكون في بيتي او بلدي طول الوقت بحس اني في حضن امي حتي لو كانت امي مش في المكان ده

احساس بالدفئ غريب وانت في عز ازمتك كفايه ان عيني بتفرح لما بشوف جدران البيت ويارب ما نجدد الروح دي

خااااااااالص قصدي البيت





الاسكندريه
الروح التانيه دي بشوفها الحبيبه اللي اتحكم علينا الفراق الي ان يشاء الله.اسعد اوقاتي فعلا لما بخطف الوقت وازورها

مهما طال الوقت معاها بيعدي لحظات سريعه وافارقها وانا علي امل ارجع لها تاني بس خلاص احنا اتعودنا علي كده

حياتي بيني وبينها زيارات يارب اجمع بيني وبالمكان ده

هوفي سعاده من ان الواحد يعيش مع حبيبته او الروح اللي حبها؟؟؟؟







الفيوم
الروح التالته ده مكان بشوفه زي الزوجه اللي امي اختارتها ليا ومحصلش قبول بينا في البدايه بس مع مرور الوقت

بدات تالفك وانت تالفها واصبح امر واقع غير ان اصبح ما بينا حجات جميله زي العشره والذكريات وسنين طويله بس

اعتقد بل متاكد اني لما افارق الروح دي كمان شهور قليله هحس ليها بالحنين والذكريات اللي بيني وبينها








القاهره
الروح الرابعه دي روح بكرها جداا اكتر من اي حاجه لان عمري ما عجبني شخصيتها بحسها خاينه بتعرف ناس كتيره

غيري وبتضحك عليهم وهما عمرهم ما حسوا معاها بدفئ زيي انا برده هو صحيح انا مش بشوفها غير قليل بس هي

بتبقي عايزه تنهي الزياره بسرعه وانا كمان ببقي حاسس اني مخنوق وساعتها ببقي نفسي اترمي في حضن الروح

الاولي