مفيش احسن من ذكريات الطفوله الجميله طبعا اللي حلاها كده هي البراءه والعفويه
طبعا كلنا عارفين ان تجاربنا واحنا صغيرين هي اللي بتشكل شخصيتنا
يعني اي تصرف حصلك وانت صغير اكيد بياثر عليك لما تكبر
وده اكيد مرتبط بذكريتنا مع اهالينا واصحابنا ومعلمينا يعني اي تجربه حصلتلك
طبعا مفيش اكتر من ذكريات المدرسه واالمدرسين مدام جبينا سيره المدرسين لازم
نقول احسن سلام للتعليم والتربيه قصدي التربيه والتعيم
يا سلام كده لما الواحد يقعد يفتكر ذكرياته مع المدرسين يقول ايه ولا ايه؟؟؟؟
طب انا مش هقول استنوا لما احكي تجربه مش قادر انساها وبعدين انتم احكموا
التجربه دي كانت مع مدرس عندنا اسمه مسترعلي.... كنت انا وشعت ساعتها في سنه تالته ابتدائي
كان بيدينا الحصه السادسه المهم ان مستر علي كان تعبان ومرهق الله يعينه جاء قال لينا مفيش
شرح النهارده طبعا كلنا فرحنا اوووي ويارب كل يوم من ده جاء المستر قعد علي الكرسي ومدد
رجله علي التربيزه ...يعني من الاخر حط رجليه في وجوهنا؟؟؟بس مش دي المشكله
المشكله ان الناظر جاء هو كمان في الوقت ده واستغرب المنظر صراحه وقاله فين
كشكول التحضير يامسترعلي؟؟؟
طبعا المستر علي التعبان المرهق الله يعينه لم يعطي الناظر اي اهتمام
وقاله يلا امشي مفيش تحضير طبعا بيقوله كده ورجليه الاتنين في وجوهنا
طبعا الناظر ده بالذات عمره ما هيسيب حقه بس الناظر طلع ذكي في تصرفه
طبعا الناظر عمل شكوه في المستر علي في الاداره
وبناء علي ذالك جابوا محقق من الاداره عشان يحقق في ذالك الامر
طبعا هنا ادرك المستر علي ان هو في خطر طب يعمل ايه؟يعمل ايه؟طبعا احنا الطلاب
اللي كان حاطط رجليه في وجههم الحل الوحيد لاننا الشاهد الوحيد علي ذلك الامر
طبعا انتم اكيد فهمتوا
طبعا بدا يسبل عيونه ويتكم معانا بادب ياتري عشان ايه ده طبعا عشان نغير الحقيقه ولما
المحقق يجي نقول ليه ان الكلام ده كله محصلش وان المستر علي كان بيشرح الدرس بجد
طبعا عشان احنا لسه صغيرين ومش فاهمين اي حاجه عملنا اللي طلبه مننا بس بعد
تخطيط منه
بس احنا كنا بنحبه عشان هو كان علي طول بيهذر وبيدينا درجات عاليه حتي لو مش نستحقها
وكمان مكنش بيعاقبنا يعني كنا بنحبه وخلاص لسبب او لاخر
حتي حبنا ليه كدب واستغل طبعا ان احنا بنحبه وبنسمع كلامه
طبعا لما المحقق جاء الفصل واختار طلاب بطريقه عشوائيه
طبعا خلينا الناظر هو اللي غلطان مش المستر علي
وقلنا ان المستر علي كان بيشرح الدرس بكل جد واجتهاد وخلافه وكل اللي
انتم عارفينه واللي ممكن انه يتقال في شهاده زور
طب اعلق علي الحكايه دي بايه؟
اقول ايه؟
اقول حاميها حراميها؟
مش عارف اقول ايه
اقول مين يربي مين؟
ومين اللي بيربينا؟
واللي بيربينا ده اتربي ولا لا؟
لما من الصغر كده طلعنا شهداء زور امال لما نكبر هنبقي ايه؟
هو فاكر ان احنا مش هنكبر وهنفهم مثلا؟
حسبنا الله ونعم الوكيل فيه
هو كده ماخدش ذنب نفسه ده اخد ذنب تلاتين طفل برئ استغلهم
وخلاهم يبقوا شهداء زور
فعلا التربيه فالتربيه ثم التعليم
ده موقف كان مع الفصل كله ,بس في موقف تاني ليا معاه انا لوحدي اصل المسترعلي ده
في نفس الشارع بتاعي
في مره واحد جالي وقالي كلم المسترعلي في البيت اصله عايزك
رحت ليه البيت
جاء قالي تعال اجمع لي درجات اعمال السنه بتاعه زمايلك
وابقي حط درجات ليهم في الخانه بتاعه الاجابه اثناء الحصه
اصل انا مش فاضي دلوقت
طبعا انتم عارفين ايه اللي حصل
طبعا ظبطت اصحابي بالدرجات العاليه واولهم شعت حطيت ليه درجه عاليه
بس مش اعلي مني
واللي كنت متغاظ منه ربنا يسامحني علي اللي عملته معاه
بس بجد مش ذنبي يا جماعه انا كنت طفل في تالته ابتدائي
معرفش ايه اللي انا بعمله ده وان كان خطير ولا لا؟
الموضوع ده ممكن احكيه وانا بضحك بس فعلا دي ذكري مؤلمه
انا مش زعلان علي الموقف قد مانا زعلان علي المدرس ده
حسبنا الله ونعم الوكيل
ده غير المدرس التاني اللي كان بيدينا درس عن خطوره الكدب وان المسلم لايكذب
وان مفيش فرق بين الكذبه البيضه والسمره
واول ماجاء الفراش من تحت وبيقوله المدير عايزك تحت
قاله قوله مش هنا
طبعا كلنا في صوت واحد قولنا انت بتكدب يا استاذ؟
طبعا رد بابتسامه مشرقه دي كدبه بيضه
المشكله ان معلمينا عايزين اعاده تاهيل
مينفعش انك تكون مسئول من حد مش فاهم ايه هي المسئوليه
بس قبل ما انهي البوست لازم اقول ان كان في مدرسين بجد كويسن ونادرين في نفس الوقت
زي الميس سحر اللي كانت بجد قدوه بس ياتري اثرها اقوي ولا
اثر مستر علي ونبيل وسامي وغيرهم وغيرهم
وان التجارب المؤلمه بتترك اثر اكتر من التجارب السعيده
حسبنا الله ونعم الوكيل في كل مدرس علمنا حاجه غلط
حسبنا الله ونعم الوكيل في كل مدرس استغل برائتنا
حسبنا الله ونعم الوكيل في كل مدرس مكنش قد المسئوليه
حسبنا الله ونعم الوكيل في كل مدرس ساهم في عدد الفشله في المجتمع
حسبنا الله ونعم الوكيل في كل مدرس هو اصلا مش مدرس
سؤال البوست
لو انت بقيت رئيس جمهوريه مصر العربيه لمده ربع ساعه
وليك قرار واحد وبعدين تسيب الحكم ياتري هيكون ايه؟
